O último estudo ‘A Economía Galega. Informe 2023‘, elaborado polo Instituto de Estudos e Desenvolvemento de Galicia (IDEGA) da Universidade de Santiago de Compostela, en colaboración coa Deputación da Coruña e a Caixa Rural Galega, pon en alerta sobre a perda de peso da industria en Galicia e demanda medidas urxentes para revitalizar este sector. O informe foi presentado polos profesores Dores Riveiro e Melchor Fernández, quen subliñaron a necesidade de reforzar o sector industrial fronte ao crecemento do turismo e os avances na produción de enerxía renovable.
Dores Riveiro destacou a preocupante situación da industria: “Chama a atención como está a crecer o peso, tanto en actividade como en emprego, no turismo pero está a baixar na industria e deberiamos reflotar ese sector industrial”. Ademais, indicou que a economía galega está a crecer a un ritmo menor que a media española, con un crecemento do 1,8% fronte ao 2,5% a nivel nacional.
Por outro lado, o presidente da, Valentín González Formoso, e o director xeral da Caixa Rural Galega, Jesús Méndez Álvarez-Cedrón, resaltaron a posición de Galicia como un territorio clave no ámbito enerxético, destacando o atractivo que isto supón para as empresas por contar con menores custos enerxéticos.
Respecto ao mercado laboral, Melchor Fernández comentou a situación positiva vivida o último ano e salientou varios retos para a rexión, incluíndo a transición enerxética, a dixitalización, e os desafíos demográficos. “A conxunción deste tres retos vai modificar completamente as relacións laborais e temos que estar preparados”, afirmou.
