O BNG, Compostela Aberta e o PSdeG de Santiago reaccionaron este luns ao anuncio do adianto das eleccións xerais ao 29 de novembro asegurando que afrontan a convocatoria preparados e situando a vivenda entre os principais asuntos que estarán en xogo nas urnas. As tres formacións, que conforman o Goberno municipal ou colaboran con el mediante acordos no Concello de Santiago, puxeron o foco nas políticas públicas para facilitar o acceso a unha casa.
A portavoz do Goberno local e concelleira do BNG, Míriam Louzao, mostrou a súa confianza en que o Bloque consiga incrementar a súa presenza nas Cortes Xerais. Louzao reivindicou a actividade desenvolvida pola formación nacionalista durante a lexislatura tanto no Congreso como no Senado e vinculouna coa defensa de cuestións que afectan directamente á cidadanía galega.
“Fixemos tanto no Congreso como no Senado un moi bo traballo, defendendo os intereses dos galegos, incluso impulsando medidas para mellorar a vida das persoas en materias tan relevantes como pode ser os dereitos sociais, a mobilidade ou a vivenda”, afirmou.
A concelleira tamén trasladou o debate á política municipal de Compostela e defendeu as actuacións adoptadas polo Executivo local en materia residencial. Segundo sostivo, o Concello actuou “desde o primeiro minuto” dentro das competencias municipais para favorecer o acceso a unha vivenda digna, ao tempo que acusou o Partido Popular de introducir “atrancos” a algunhas destas políticas.
Louzao mostrouse convencida de que o electorado galego terá en conta o traballo realizado polo BNG durante a actual etapa parlamentaria. A vivenda, xunto cos dereitos sociais e a mobilidade, figura así entre os ámbitos cos que a formación compostelá relaciona a convocatoria electoral anticipada.
COMPOSTELA ABERTA RECLAMA “MEDIDAS VALENTES” ANTE A SITUACIÓN DA VIVENDA
Tamén se pronunciou a tenente de alcaldesa e líder de Compostela Aberta, María Rozas, que expresou o seu desexo de que das urnas saia un goberno de carácter progresista que sitúe entre as súas prioridades as dificultades para acceder á vivenda.
“Creo que estamos ante unha emerxencia social, que xa chegamos tarde como sociedade para atender, que necesitamos de medidas valentes, e por tanto necesítase un goberno progresista que se preocupe e que entenda que a vivenda é un dereito básico e non un negocio”, declarou Rozas.
A dirixente de Compostela Aberta contrapuxo esa posición coas políticas defendidas polo PP, ao que responsabilizou de promover normas que, ao seu xuízo, favoreceron a especulación inmobiliaria. Tamén criticou a posición dos populares respecto da actuación dos fondos de investimento no mercado residencial.
Rozas fixo ademais referencia ás mobilizacións protagonizadas nos últimos días pola mocidade e polos colectivos en defensa do dereito á vivenda en Santiago, que levaron as súas reivindicacións á praza do Obradoiro. “Espero que eses mozos que colleron a iniciativa consigan cambiar esta situación. Teñen todo o apoio de Compostela Aberta”, sinalou.
GUINARTE CONSIDERA AS ELECCIÓNS “FUNDAMENTAIS” PARA SANTIAGO
Desde o PSdeG de Santiago, o seu portavoz municipal, Sindo Guinarte, cualificou a convocatoria do 29 de novembro como “fundamental” para Compostela ao entender que o resultado das eleccións xerais terá efectos directos sobre as políticas que afectarán á cidade durante os próximos anos.
Entre elas destacou novamente a vivenda. Guinarte apuntou que Santiago conta con máis de 6.000 vivendas baleiras e advertiu das crecentes dificultades para atopar un alugueiro a un prezo asumible. Ante esta situación, reclamou aumentar a oferta residencial de titularidade pública e incorporar ao mercado parte dos inmobles actualmente sen uso.
“É indispensable ampliar o parque público, mobilizar a vivenda baleira e seguir contando coas ferramentas que puxo en marcha o Goberno de España”, afirmou o portavoz socialista.
Guinarte enmarcou as eleccións nunha confrontación entre distintas propostas en materia residencial. “Hai dous modelos claramente diferentes: un goberno socialista que defende a intervención pública para facilitar o acceso á vivenda, e a dereita, que se opuxo a estas políticas”, declarou.
O representante socialista tamén defendeu a relación mantida durante os últimos anos entre o Executivo estatal e Santiago e sinalou que o seu partido aspira a manter esa liña tras as eleccións. Segundo Guinarte, para a cidade resultou importante contar cun Goberno de España “comprometido” con Compostela e o obxectivo dos socialistas é que esa colaboración teña continuidade.
