A reivindicación da memoria das vítimas da represión franquista centrou un acto no que representantes do BNG de Ames advertiron tamén do avance de discursos que, ao seu xuízo, buscan relativizar a ditadura e cuestionar as políticas públicas destinadas á recuperación e dignificación das persoas represaliadas.
A voceira nacionalista en Ames, Escarlata Pampín, enmarcou a lembranza das vítimas nun contexto no que considera que están a medrar posicións políticas que pretenden revisar os consensos democráticos arredor da ditadura. “Ese branqueamento non é pasado: é un aviso. Quen banaliza o franquismo está abrindo a porta á intolerancia, á violencia, á xenofobia e en definitiva, está ameazando á democracia e ós dereitos humanos”, afirmou.
Na mesma liña pronunciouse Xosé Luis Rivas ‘Mini’, que vinculou a conservación da memoria histórica coa aplicación da Lei de Memoria Democrática, as exhumacións e a recuperación dos restos e das historias das persoas asasinadas tras o golpe de Estado de 1936.
“Agora, noventa anos despois, séntense incómodos coa lei de Memoria Democrática, con isto das exhumacións e con que queiramos recuperar e render memoria e recoñecemento a quen foron asasinados vil e covardemente”, sinalou.
Rivas defendeu que as institucións e a sociedade teñen unha responsabilidade coa investigación e o recoñecemento do ocorrido durante a represión. “Cumprimos e cumpriremos coa nosa obriga para coa verdade. Ningún crime debe quedar sen castigo, que alomenos teña a carga de censura que unha sociedade democrática debe exercer sobre os verdugos”, engadiu.
CRÍTICAS AO GOBERNO MUNICIPAL DE AMES
Durante o acto, Pampín dirixiu tamén críticas ao goberno local do PSOE de Ames, ao que reprochou unha insuficiente participación nas iniciativas vinculadas á recuperación da memoria das vítimas.
“Sorpréndenos e dóenos a falta de implicación do goberno do PSOE amesán que semella non entender a importancia de dignificar esta memoria colectiva”, asegurou a voceira do BNG.
Pampín insistiu en que a formación nacionalista manterá este asunto entre as súas reivindicacións políticas e sociais no municipio. “Porque nós non imos aceptar o silencio que outros permiten. Mentres teñamos voz, non haberá esquecemento nin impunidade”, manifestou.
O acto incorporou igualmente unha dimensión familiar da represión a través da intervención de Alejandra Tojo, que lembrou o asasinato do seu bisavó en agosto de 1936 e evocou tamén os coñecidos como ‘Homiños de Boimorto’.
“Din que, mentres un non esqueza a alguén, seguirá vivo dalgún xeito. A mediados de agosto do 36 asasinaron a meu bisavó. Asasinaron aos ‘Homiños de Boimorto’. Noventa anos despois son inmortais”, afirmou.
