O Concello de Santiago presentou un novo programa de creación de produtos turísticos co obxectivo de diversificar a oferta da cidade e avanzar cara a un modelo máis equilibrado, no marco do Plan de Sustentabilidade Turística en Destino (PSTD). A iniciativa foi dada a coñecer pola concelleira de Turismo, Míriam Louzao, acompañada polo director da Axencia de Turismo de Galicia, Xosé Manuel Merelles, e polo CEO da empresa adxudicataria do programa, Víctor Sixto.
A concelleira explicou que Santiago é un dos destinos máis visitados de Europa, o que supón “un privilexio”, pero tamén “unha responsabilidade”, ao advertir dos impactos que a concentración turística pode ter sobre o patrimonio, a veciñanza e a propia experiencia das persoas visitantes. Neste sentido, defendeu que a diversificación turística é unha prioridade do goberno local, co fin de construír “un destino máis sostible, competitivo e xusto”.
O programa está dirixido a empresas e entidades situadas no termo municipal e pretende poñer en valor recursos menos coñecidos, especialmente aqueles situados fóra das zonas con maior afluencia. Segundo detallou Louzao, a iniciativa busca estruturar e levar ao mercado propostas vinculadas á natureza, a cultura, a gastronomía ou a artesanía, entre outros ámbitos.
As entidades participantes recibirán acompañamento durante todo o proceso, dende o deseño da experiencia ata a súa comercialización. O proxecto inclúe tamén probas con visitantes reais, co obxectivo de avaliar o funcionamento das propostas antes da súa saída ao mercado. A participación é gratuíta, ao estar financiada polo Concello, a Xunta e a Secretaría de Estado de Turismo.
Pola súa banda, Merelles destacou a colaboración entre administracións neste plan, no que cada unha achega un millón de euros, e sinalou a necesidade de adaptar o modelo turístico ás novas demandas tras a pandemia. O director da Axencia incidiu en que Santiago conta cunha longa tradición como destino de peregrinación e turismo, e subliñou a importancia de ampliar a oferta máis alá do centro histórico para repartir os beneficios do sector.
Dende a empresa encargada do desenvolvemento do programa, Víctor Sixto explicou que o obxectivo é crear experiencias turísticas con valor emocional, máis alá dos produtos convencionais. O proceso incluirá unha fase inicial de análise de recursos, seguida de formación para as empresas en ámbitos como cooperación, diferenciación ou comercialización.
O proxecto contempla a realización de oito cursos formativos e tres obradoiros prácticos, dos que sairán novas propostas turísticas que serán recollidas nun catálogo final. Ademais, prevese a recollida de arredor de mil valoracións de usuarios durante a fase de testeo.
Entre as tipoloxías prioritarias figuran o turismo cultural e patrimonial, gastronómico, creativo, verde, familiar e de incentivos, aínda que poderán incorporarse outras segundo as iniciativas das entidades participantes. O programa fixa como meta a creación de varios produtos turísticos, incluíndo visitas guiadas, rutas interpretativas e experiencias que integren pernocta.
O calendario prevé o inicio da formación nas vindeiras semanas, mentres que o testeo das experiencias terá lugar previsiblemente no outono, fóra da tempada alta, co fin de contribuír tamén á desestacionalización da demanda.
Durante a rolda de prensa, Louzao insistiu en que esta iniciativa forma parte dunha estratexia máis ampla para conseguir “un Santiago que recibe ben porque distribúe ben”, e no que os beneficios do turismo “cheguen a toda a cidade e non só ao centro monumental”.
