A concelleira non adscrita Mercedes Rosón anunciou que trasladará ao vindeiro Pleno municipal a situación do treito final da rúa Forniños, un asunto que, segundo explicou, continúa sen resolución por parte do Concello malia as solicitudes realizadas pola veciñanza.
Rosón lembrou que foi en xuño de 2023 cando varias persoas residentes na zona pediron ao goberno local un informe para esclarecer a titularidade deste tramo, unha cuestión que, a día de hoxe, segue sen resposta. Segundo indicou, esta falta de información está a xerar incerteza entre a veciñanza, ao existir versións contraditorias sobre a propiedade do espazo.
A edil sinalou que hai un particular que afirma ter adquirido ese treito, mais advertiu de que esa circunstancia non figura recollida no catastro, polo que non se pode determinar con claridade se se trata dunha vía pública ou dunha propiedade privada. “Estamos ante unha situación que xera moitas dúbidas”, apuntou.
Ademais, Rosón puxo o foco nun elemento adicional: a existencia histórica dun paso de conexión coa rúa da Campiña, empregado tradicionalmente pola veciñanza. Neste sentido, considera necesario aclarar se existe unha servidume de pasoe, no seu caso, se debe ser mantida e garantida.
A concelleira incidiu en que a súa iniciativa busca obter “claridade, seguridade xurídica e unha resposta ás persoas que levan case tres anos agardando”, ao tempo que reclamou ao Concello que resolva unha situación que afecta directamente ao uso e á accesibilidade dun espazo urbano.
