O grupo promotor dun acto de recoñecemento a Álvaro García Ortiz presentou este xoves en Santiago de Compostela unha iniciativa que busca render homenaxe ao ex fiscal xeral do Estado dende unha perspectiva cívica e veciñal. A convocatoria, organizada de maneira autoxestionada, terá lugar o próximo xoves 23 ás 19:00 na Casa das Máquinas, no ámbito do barrio de San Lourenzo e o Sarela.
Durante a presentación no Café Airas Nunes, Encarna Otero explicou que o acto nace como unha “invitación ao conxunto da cidadanía” para participar nun evento que pretende expresar “afecto, veciñanza e recoñecemento” a unha persoa que decidiu residir na cidade. Segundo indicou, a elección do espazo responde á vontade de celebralo nun lugar próximo ao seu barrio.
Pola súa banda, o historiador do grupo Histagra Lourenzo Fernández Prieto subliñou que se trata dun “acto de recoñecemento cívico” centrado na traxectoria persoal e profesional de García Ortiz, destacando tanto o seu papel como fiscal de medio ambiente en Galicia como o seu posterior nomeamento como fiscal xeral do Estado. “É unha persoa que, como moitos de nós, ten vida cívica e veciñal en Santiago”, afirmou, incidindo no vínculo directo do homenaxeado coa cidade.
O evento contará coa participación de integrantes do grupo promotor —entre os que figuran Xesús Veiga Buxán, Xoaquín Fernández Leiceaga, Manuel López Rivadulla, Marta Lois González, Encarna Otero Cepeda, e o propio Fernández Prieto— así como doutras figuras do ámbito educativo, xurídico e institucional. Entre as intervencións previstas están as de representantes da Unión Progresista de Fiscais, do Ateneo de Santiago, do ámbito universitario e do Concello.
Ademais das intervencións orais, o programa incluirá tres actuacións musicais breves, co obxectivo de acompañar o desenvolvemento do acto. O peche corresponderá ao propio Álvaro García Ortiz, quen intervirá ao final da xornada.
Os organizadores insistiron en que o acto non pretende entrar en debates políticos, senón poñer en valor a dimensión humana e a relación do homenaxeado coa comunidade compostelá. “Non é habitual recoñecer ás persoas en vida, pero cremos que é necesario facelo”, sinalou Otero.
Segundo indicaron, a resposta inicial da cidadanía foi positiva, cunha ampla disposición á participación tras a difusión da convocatoria a través de canles informais. O grupo promotor agarda que o acto reúna a un número significativo de asistentes e se desenvolva nun ambiente aberto e participativo.
