O Centro de Investigación Mestrelab (CIM), situado en Santiago de Compostela, acadou nos seus primeiros meses de actividade un balance de 56 científicos incorporados ás súas instalacións desde a súa posta en marcha no ano 2024. Segundo os datos presentados, esta actividade traduciuse na creación de 27 postos de traballo e na implantación de nove empresas especializadas, nas que desenvolven o seu labor diario un total de 29 investigadores.
A presentación destes resultados tivo lugar este mércores na capital galega, nun acto no que o conselleiro de Educación, Ciencia, Universidades e FP, Román Rodríguez, puxo en valor “a capacidade deste centro para atraer investigadores que traballen desde Galicia e contribúan a reforzar a aposta da Xunta polo I+G+i”.
Durante a súa intervención, o responsable autonómico destacou o papel do CIM como referente no ámbito científico, definíndoo como un “centro de excelencia” no que se desenvolven liñas de investigación vinculadas á intelixencia artificial aplicada á bioloxía estrutural, á sustentabilidade e circularidade e ao procesado avanzado de datos en espectrometría de masas exacta.
Entre os principais fitos acadados neste primeiro ano e medio de funcionamento, sinalouse tamén a posta en marcha de colaboracións internacionais co grupo Lonza, así como a conexión co ecosistema científico galego a través de entidades como a Rede CIGUS, o hub Datalife ou a Axencia Española de Supervisión da Intelixencia Artificial.
Ademais, o centro integrouse en organismos especializados como Gradiant ou o Clúster Tecnolóxico Empresarial das Ciencias da Vida de Galicia (Bioga), reforzando así a súa posición dentro do sistema de innovación galego.
