O Grupo Municipal Socialista no Concello de Santiago, a través da concelleira Marta Abal, trasladou a súa preocupación pola situación das obras de reurbanización na rúa García Lorca, no barrio de Guadalupe, que segundo sinala levan máis tempo paralizadas que en execución dende o seu inicio en setembro de 2025.
Segundo explicou Abal, a veciñanza da zona atópase inquieta ante a falta de actividade visible na obra e pola ausencia de información sobre cando se retomarán os traballos. A edil indicou que o goberno local comunicara previamente que a necesidade de introducir modificacións no proxecto implicaría un atraso aproximado dun mes na reactivación, un prazo que, segundo denuncia, xa foi superado sen que se produzan avances.
Neste contexto, a concelleira socialista asegurou que a situación actual é a dunha intervención “abandonada sen actividade visible”, o que incrementa a incerteza entre as persoas residentes na contorna.
ESIXENCIA DE TRANSPARENCIA E PRAZOS CONCRETOS
Dende o PSOE reclaman ao executivo municipal que facilite información clara e actualizada sobre o estado da actuación. Abal insistiu na necesidade de que se comunique á veciñanza unha data concreta para a reanudación das obras e que se revise o calendario previsto en función da situación actual.
A edil subliñou que, aínda que este tipo de intervencións urbanísticas implican molestias inevitables, estas non deben verse agravadas pola falta de comunicación institucional. Neste sentido, afirmou que “as molestias que unha intervención destas características provoca na vida do barrio son inevitables, pero non poden verse agravadas pola falta de información e pola ausencia de diálogo”.
