O director de Turismo de Galicia, Xosé Merelles, mantivo este luns unha reunión de traballo cos responsables da Unión Hoteleira Compostela co obxectivo de deseñar estratexias que garantan a ocupación turística na cidade durante todo o ano. Durante o encontro, os representantes do sector trasladaron a necesidade de incentivar a promoción de Santiago de Compostela como destino urbano, poñendo o foco especialmente nos meses de tempada baixa, fóra dos picos habituais de afluencia de visitantes.
No marco desta rolda de contactos cos axentes do sector, o director de Turismo analizou tamén os preparativos para o vindeiro Xacobeo 2027. Merelles subliñou a importancia de que a Xunta siga a impulsar accións que incrementen a oferta complementaria para os viaxeiros, garantindo que a capital conte con atractivos máis aló do Camiño que motiven a estancia en calquera época do calendario.
Finalmente, o responsable autonómico amosou o seu compromiso para reforzar a proxección de Santiago tanto no mercado nacional como no internacional. O apoio institucional centrarase en levar a cabo accións de comunicación e marketing que consoliden a marca da cidade como un destino de calidade e sostible, capaz de atraer fluxos de viaxeiros de xeito constante e evitar así a concentración excesiva en períodos concretos.
