A Garda Civil recuperou este sábado o corpo sen vida dun home localizado no río Tambre, ao seu paso polo lugar de Ons, no concello de Brión.
Segundo informou o instituto armado, o operativo de busca iniciouse na tarde do venres, despois de que un particular comunicase a presenza dun vehículo nas proximidades do río. A partir desa alerta, activouse un dispositivo de procura na zona.
Foi na mañá deste sábado cando se produciu o achado do corpo no curso fluvial. Ata o lugar desprazáronse efectivos do Grupo Especial de Actividades Subacuáticas (GEAS), que procederon á recuperación do cadáver arredor das 13:15.
Tras a intervención, o corpo foi trasladado ao Instituto de Medicina Legal de Galicia (Imelga), en Santiago de Compostela, onde se lle practicará a autopsia para determinar as causas do falecemento.
Polo momento, non transcenderon máis datos sobre a identidade da persoa falecida nin sobre as circunstancias nas que se produciu o suceso, que continúa baixo investigación.
