Unha paciente oncolóxica do Hospital Clínico Universitario de Santiago denunciou un percorrido administrativo que cualifica de “carreira de obstáculos” para acceder a unha proba diagnóstica necesaria dentro do seu proceso de reconstrución mamaria, nun caso que a Asociación de Pacientes e Usuarios do CHUS considera representativo de fallos estruturais no sistema sanitario.
Segundo o testemuño de O.R.R., tras ser sometida a unha mastectomía o 20 de febreiro de 2025 por un carcinoma invasivo, iniciou un proceso para valorar unha reconstrución mediante técnica DIEP. A paciente solicitou unha segunda opinión médica, que lle foi concedida o 23 de febreiro de 2026, e acudiu o 3 de marzo ao Complexo Hospitalario Universitario da Coruña, onde recibiu indicación para realizar unha anxio-TAC de veas perforantes abdominais.
A partir dese momento, segundo relata, comezaron as dificultades para tramitar a proba na súa área sanitaria de referencia, en Santiago. “A partir deste momento comeza unha carreira de obstáculos burocrática impropia dun servizo público de saúde”, afirma no seu testemuño.
A paciente describe un percorrido por distintos servizos do CHUS —Radioloxía, Cardioloxía e Admisión— sen que ningún deles asumise a xestión da proba nin identificase con claridade o procedemento solicitado. Incluso, segundo sinala, chegou a recibir recomendacións informais sobre como actuar no caso de perda da documentación. “Indicáronme que a proba non se realizaba nese servizo e que debería solicitala noutro”, explica.
Tras varios días de xestións e consultas, a paciente recibiu finalmente unha cita a través do sistema do SERGAS. Porén, a proba asignada non se correspondía coa prescrita: tratábase dun TC de arterias coronarias, en lugar da anxio-TAC necesaria para avaliar a reconstrución mamaria. “A día de hoxe, non teño a certeza de que a proba programada sexa realmente a que necesito”, advirte.
A situación, segundo indica, está a provocar un impacto emocional significativo nun momento de especial vulnerabilidade: “Toda esta situación estame a xerar ansiedade, incerteza, nervios e decaemento”.
Desde a Asociación de Pacientes do CHUS consideran que este caso evidencia unha falla de coordinación interna e unha transferencia de responsabilidades entre servizos que recae directamente sobre os pacientes. Ademais, alertan de que a asignación dunha proba incorrecta podería supoñer un risco para a saúde ao tratarse dun procedemento non prescrito.
A entidade tamén subliña unha posible vulneración da normativa vixente. O artigo 14.1 do Decreto 54/2015 establece que as probas complementarias vinculadas a unha segunda opinión médica deben realizarse con carácter preferente nun prazo máximo de 15 días naturais. No caso descrito, a paciente acumula xa unha demora superior a ese límite sen data confirmada para a realización da proba correcta.
A asociación reclama que a xerencia da área sanitaria de Santiago-Barbanza e a Subdirección de Humanización e Atención ao Cidadán interveñan para resolver o caso e adopten medidas que eviten a repetición de situacións semellantes. Segundo sinalan, “os problemas organizativos están a trasladarse aos pacientes, afectando directamente aos seus procesos de recuperación e aos seus dereitos recoñecidos”.
