O Consorcio de Santiago está a desenvolver as obras de restauración do hórreo situado na Finca de Vista Alegre, en Santiago de Compostela, cun investimento de 17.165,52 euros, co propósito de recuperar este elemento tradicional e asegurar a súa conservación a longo prazo.
A intervención céntrase na consolidación estrutural do hórreo, que presentaba un estado avanzado de deterioración. Entre os danos detectados atopábase o colapso parcial da cuberta, así como afeccións nos elementos portantes, nas carpintarías e na fábrica pétrea da construción.
Os traballos iniciáronse coa limpeza da contorna e do interior, que incluíu a retirada de vexetación e de restos acumulados, co fin de facilitar as actuacións posteriores e mellorar o estado xeral do conxunto.
No relativo á cuberta, estase a proceder ao desmontado da estrutura para intervir na armadura de madeira de castiñeiro, que será reparada. Posteriormente, realizarase a recolocación das tellas, priorizando a reutilización das pezas existentes e incorporando outras de características similares cando sexa necesario completar a cubrición.
A actuación contempla tamén a restauración das portas, coa recuperación dos seus elementos metálicos mediante técnicas tradicionais, así como a limpeza e rejuntado dos paramentos pétreos, co obxectivo de evitar filtracións e mellorar a durabilidade da construción.
