A colaboración entre o Concello de Santiago de Compostela e a empresa de economía social Coregal consolidouse nos últimos anos como unha das principais ferramentas para mellorar a recollida selectiva de cartón comercial na cidade. Os datos rexistrados desde 2021 reflicten un crecemento continuado do servizo porta a porta, que pasou de 246,31 toneladasrecollidas aquel ano a 606,52 toneladas en 2025, máis do dobre de material xestionado, cun incremento acumulado do 146%.
Esta evolución sostida está vinculada a unha maior implicación do tecido empresarial e comercial de Santiago, así como a un proceso progresivo de concienciación sobre a correcta separación dos residuos e os beneficios ambientais da reciclaxe. Segundo trasladan as entidades implicadas, as campañas de información e acompañamento desenvolvidas tiveron un papel determinante na mellora dos hábitos de xestión do cartón, especialmente no ámbito do pequeno comercio e da hostalaría.
O incremento das cantidades recollidas veu acompañado tamén dun aumento significativo no número de establecementos adheridos ao servizo. Se no ano 2021 eran arredor dun cento os locais que utilizaban a recollida porta a porta, na actualidade a cifra achégase aos 500 establecementos. Só no último ano formalizáronse preto de 200 novas adhesións, como resultado directo das accións de sensibilización impulsadas polo Concello e Coregal.
Estas actuacións incluíron arredor de 1.000 visitas informativas realizadas durante os meses de novembro e decembro, dirixidas a comercios, negocios de hostalaría e servizos. A campaña desenvolveuse entre o 11 de novembro e o 9 de decembro e percorreu medio cento de rúas das principais zonas comerciais da cidade, como o Ensanche, a Cidade Histórica, San Lázaro–Avenida de Lugo e o ámbito de Santa Marta–A Choupana.
Ao longo destes anos tamén se ampliaron as áreas nas que se presta o servizo porta a porta, coa incorporación de novas rúas tanto na zona norte como na sur de Santiago, o que permitiu aumentar a cobertura e facilitar o acceso ao sistema de recollida selectiva a un maior número de establecementos.
Un dos obxectivos centrais da campaña foi reforzar a importancia de dobrar e separar correctamente o cartón antes da súa retirada, evitando o depósito de caixas sen pregar na vía pública. Esta práctica contribúe non só a optimizar o funcionamento do servizo, senón tamén a reducir o impacto visual nos espazos urbanos.
Desde o Concello de Santiago e Coregal valórase de maneira positiva a resposta do sector comercial, ao considerar que a combinación de información directa, proximidade e acompañamento continuado resulta clave para avanzar cara a un modelo de xestión de residuos máis eficiente, sustentable e aliñado cos principios da economía circular na capital galega.
