O Goberno local de Compostela avanzou que está a estudar posibles sancións contra Eulen tras a súa renuncia ao contrato para a dinamización e mediación da rede de centros socioculturais da cidade, un dos tres lotes nos que se divide a xestión deste servizo municipal. A adxudicación fora aprobada o pasado 21 de xaneiro, mais a empresa comunicou a súa decisión a poucos días do prazo límite para a sinatura do contrato.
Segundo trasladou o Concello de Santiago de Compostela, esta renuncia produce un escenario que impide a subrogación do persoal nunha nova empresa dentro dos prazos inicialmente previstos, unha circunstancia que afecta directamente ás traballadoras e traballadores dos centros socioculturais.
Nun comunicado municipal, o Goberno local explicou que Eulen xustificou a súa decisión en dous motivos principais. O primeiro deles é a débeda salarial da anterior empresa concesionaria, que a adxudicataria cifra en máis de 137.000 euros. A este respecto, o Concello precisou que, “en ningún caso”, o pagamento destes soldos pendentes correspondería á nova empresa, lembrando que a Administración local mantén retidas as últimas facturas da actual prestadora do servizo como garantía para facer fronte aos atrasos salariais.
O segundo motivo alegado pola empresa está relacionado cun procedemento xudicial en curso, iniciado pola representación sindical do persoal, para que se lles aplique o convenio colectivo de eventos, servizos e producións culturais, no canto do convenio do sector do lecer e da animación sociocultural que figura nos pregos da licitación. Sobre esta cuestión, o Concello subliñou que non existe sentenza firme a día de hoxe.
Ante esta situación, o Goberno municipal anunciou que está a analizar “todas as vías legais posibles” para a imposición de penalidades á empresa, incluíndo as opcións previstas na Lei de contratos do sector público, entre elas a prohibición de contratar en futuros procedementos de licitación.
De maneira paralela, o Executivo local sinalou que está a avaliar as alternativas xurídicas dispoñibles para que a decisión de Eulen teña o menor impacto posible sobre o persoal, tendo en conta que a renuncia da adxudicataria dificulta a continuidade do servizo nas condicións inicialmente planificadas.
