O Consello do Estudantado da Universidade de Santiago de Compostela, máximo órgano de representación do alumnado, fixo un chamamento público a todas as candidatas á Reitoría para que incorporen de maneira central nas súas campañas as necesidades e propostas do colectivo estudantil.
Segundo sinala o Consello, os primeiros actos da campaña electoral, así como algúns debates xa celebrados, deixaron en segundo plano as problemáticas do alumnado. O órgano estudantil lembra que o estudantado é un colectivo fundamental da institución, tanto polo seu peso na vida universitaria como pola súa relevancia no voto ponderado do proceso electoral.
Co obxectivo de garantir que as demandas do alumnado sexan escoitadas e debatidas, o Consello do Estudantado anunciou a organización de dous debates específicos, centrados exclusivamente nas cuestións que afectan ao estudantado da USC. Nestes encontros participarán tanto as candidatas á Reitoría como as persoas propostas para asumir as vicerreitorías con competencias en estudantes.
O primeiro dos debates celebrarase no campus de Lugo, o martes 4 de febreiro, ás 18:00, no Salón de Actos da Escola Politécnica Superior de Enxeñaría. A sesión estruturarase en catro bloques temáticos: servizos, bolsas e axudas; normativa de permanencia, asistencia e avaliación; igualdade, diversidade e atención psicolóxica, e mobilidade e vivenda en Lugo.
O segundo encontro terá lugar no campus de Santiago, o mércores 5 de febreiro, tamén ás 18:00, no Salón de Actos da Facultade de Ciencias Políticas e Sociais. Neste caso, os bloques abordarán a participación estudantil e o asociacionismo, a calidade, a lingua, cultura e deportes, así como a mobilidade e a vivenda en Santiago.
Dende o Consello do Estudantado sublíñase que estes debates pretenden ofrecer un espazo específico de diálogo no que as candidatas poidan presentar propostas concretas orientadas a mellorar a vida dos arredor de 25.000 estudantes da USC. A entidade considera que non é suficiente limitar este tipo de reflexións a encontros puntuais e entende que as cuestións estudantís deberían estar presentes en todos os actos de campaña.
O órgano de representación estudantil indica tamén que a convocatoria destes debates responde á necesidade de evitar que o alumnado quede relegado a un papel secundario nunhas eleccións que marcarán o futuro da universidade, ao tempo que busca fomentar a participación estudantil no proceso electoral.
Finalmente, o Consello do Estudantado convidou aos medios de comunicación a difundir e cubrir estes debates, aos que define como unha oportunidade para coñecer as propostas reitorais desde a perspectiva do colectivo que constitúe a razón de ser da Universidade de Santiago de Compostela.
