O subdelegado do Goberno na Coruña, Julio Abalde, reuniuse na mañá deste xoves con representantes de varias asociacións veciñais de Santiago para analizar a situación de seguridade na cidade, dentro da que chamou á colaboración cidadá.
Ao mesmo tempo, remarcou o “traballo constante” da Policía Nacional e destacou o “éxito” das últimas operacións de loita contra o narcotráfico, que permitiron retirar máis de 12,5 toneladas de droga nos últimos meses en toda Galicia.
Como exemplos, apuntou á operación ‘Lezna’ da Garda Civil e a Axencia Tributaria, que permitiu eliminar unha organización criminal da provincia da Coruña e intervir 135 quilos de haxix e 31 de cocaína; a operación ‘Oxford’ da Policía Nacional, coa incautación de 10.000 dose de cocaína, e a desarticulación dun punto de venda en Fontiñas.
Durante o encontro, segundo recolle unha nota de prensa, Abalde destacou o papel “fundamental” da colaboración cidadá e lembrou, que ante calquera indicio de actividade delituosa, é “esencial” informar as forzas de seguridade.
Neste sentido, remarcou que a Policía Nacional conta con canles directas de comunicación –presenciais, telefónicas e dixitais– e coa aplicación ‘AlertCops’, que permite un contacto rápido e sinxelo coa Policía Nacional e a Garda Civil.
