A conselleira de Vivenda e Planificación de Infraestruturas, María Allegue, incidiu en que a Xunta “non entende” o motivo e que leva “xa dous anos” á espera de que o Concello de Santiago ceda parcelas públicas baleiras para que se constrúan vivendas protexidas. En declaracións aos medios de comunicación durante un acto en Santiago este martes, a titular autonómica manifestou que desde o Goberno galego “queren seguir coa construción de vivenda” na capital compostelá, pero que o consistorio non o permite.
“Levamos xa dous anos á espera de que o concello nos ceda parcelas da súa titularidade. Non entendemos o motivo de por que non se fai esta cesión”, subliñou Allegue, á vez que mencionou que en polo menos outros oito concellos xa se están levando a cabo obras. Por iso, recalcou que desde o goberno autonómico se articularon “medidas normativas” para axilizar a construción. Así, explicou que desde o 1 de xaneiro están en marcha “novas medidas”, concretamente nos chans dotacionais, para que “se poida construír vivenda pública protexida sen a necesidade de ter que modificar o plan“.
“Non hai tempo que perder”, subliñou Allegue ao referirse especificamente a unha parcela na Rúa Evaristo Nogueira Romero, en Santiago, onde a Xunta xa abriu a licitación de redacción do proxecto para a construción de aproximadamente 36 vivendas. Para a realización do proxecto, que conta cun investimento total de obra estimada de 7 millóns de euros, poderanse presentar ofertas ata o próximo 20 de febreiro. “Sabemos que non hai tempo que perder para dar cumprimento a esa demanda da nosa cidadanía e da nosa mocidade”, concluíu a conselleira.
