O Concello de Ames, a través da Concellaría de Xestión do Medio Natural, avanza na implantación das comunidades enerxéticas no municipio coa contratación dun servizo de asistencia técnica destinado a apoiar tanto ao propio Concello como ás Comunidades Enerxéticas de Ames na execución do seu primeiro proxecto de autoconsumo colectivo. O obxectivo desta actuación é dispor de asesoramento técnico especializado tanto no proceso de instalación de plantas fotovoltaicas como na xestión coas diferentes empresas comercializadoras de electricidade.
O Concello participa como un socio máis na entidade ‘Comunidade Enerxética Ames Solar’, unha asociación sen ánimo de lucro que promove a produción e o consumo compartido de enerxía, principalmente a través de proxectos de instalación solar fotovoltaica no termo municipal. A asociación está integrada por 42 socios e socias e conta cunha xunta directiva diversa, con representación de parroquias como Trasmonte, Ames, Biduído ou Tapia, entre outras, así como membros procedentes de practicamente todas as parroquias do concello.
A contratación desta asistencia técnica ten como finalidade facilitar a posta en marcha do primeiro proxecto piloto, ao tempo que se establece unha metodoloxía de traballo que poida ser sólida e replicable en futuras actuacións. O concelleiro de Xestión do Medio Natural, Javier Antelo, explicou que “esta actuación facilita a definición dunha metodoloxía de traballo sólida e escalable, que permitirá sentar as bases para o desenvolvemento de novas instalacións en cubertas municipais, ao tempo que garante a coordinación efectiva entre os distintos axentes implicados”.
Segundo indicou o edil, esta iniciativa contribúe de maneira directa á implantación da Axenda Urbana de Ames e ao cumprimento dos obxectivos europeos da transición verde, así como á transformación dixital, á participación cidadá e á democratización do acceso á enerxía renovable, en coherencia co Pacto Verde Europeo.
O proxecto enmárcase como continuidade das axudas recibidas para a creación da Oficina de Transformación Comunitaria (OTC), dentro do Programa CE-OFICINAS, impulsado polo Plan de Recuperación, Transformación e Resiliencia e financiado pola Unión Europea – NextGenerationEU. A través da OTC desenvolvéronse accións de difusión e dinamización das comunidades enerxéticas e, con este novo contrato, preténdese dar o salto á materialización efectiva do primeiro proxecto de autoconsumo colectivo.
No marco deste proceso, o Concello puxo en marcha a páxina web ‘Ames Enerxía’, concibida como unha ferramenta informativa para a veciñanza interesada en participar na comunidade enerxética. Ademais, a semana pasada celebrouse unha nova xuntanza da asociación ‘Comunidade Enerxética Ames Solar’ para continuar avanzando na creación destas iniciativas. As persoas interesadas poden ampliar información tamén a través do correo electrónico asociacionamessolar@gmail.com.
