O Talentia Summit pechou a súa feira virtual de emprego e formación cun balance marcado pola elevada participación e o volume de interacción entre persoas candidatas e empresas. Entre o 9 e o 11 de decembro, o evento permitiu a intermediación de 1.278 currículos, a programación de 965 citas profesionais e mentorías online e a cobertura de 2.522 prazas en accións formativas, segundo os datos facilitados pola organización.
A plataforma web do Talentia Summit rexistrou desde o mes de novembro un total de 41.294 sesións, coincidindo co desenvolvemento das distintas actividades. No ámbito do emprego, a feira virtual facilitou encontros directos entre participantes e empresas de vinte sectores profesionais, con preto de 300 vacantes activas en ámbitos como informática e telecomunicacións, atención sanitaria, administración de empresas, loxística ou vendas.
As citas axendadas incluíron tamén sesións de mentoría orientadas a procesos de cambio profesional, apoio a proxectos laborais, mellora das habilidades comunicativas ou asesoramento práctico para incrementar a empregabilidade. Estas accións desenvolvéronse en formato dixital ao longo dos días centrais da feira.
APOSTA POLA FORMACIÓN
A programación formativa volveu ser un dos piares do encontro, cunha oferta que acadou unha ocupación completa. Cubríronse todas as prazas dos 115 cursos online dispoñibles, así como as da aula virtual e as correspondentes á Certificación Oxford Test of English, en distintos niveis. Ademais, ocupouse preto do 80% das prazas gratuítas ofrecidas a través das plataformas LinkedIn Learning e Talentia IT Skills, que permiten acceder a formación oficial de tecnolóxicas como Microsoft, Cisco, Meta ou JavaScript.
A edición de 2025 do Talentia Summit arrancou o 4 de decembro co ‘Foro Talentia’, celebrado no Palacio de Congresos de Santiago de Compostela, que reuniu a centos de persoas, maioritariamente mozas e mozos. A sesión estivo centrada no impacto da intelixencia artificial e nos retos da Xeración Z no ámbito profesional.
No foro participaron a pianista compostelá Isabel Dobarro, gañadora dun Grammy Latino; Sebastián Brandt, director executivo de Odoo España; Lara Neira, CEO e confundadora da startup Nigal e doutora en intelixencia artificial; Sergio Lucas, CEO e fundador de Leeters; así como Saúl Campos e Anadía Delgado, do grupo Go Talents. O encontro marcou o inicio dunha programación que tivo continuidade coa feira virtual de emprego e formación, consolidando o ‘Talentia Summit’ como un espazo de referencia para a conexión entre talento, empresas e capacitación profesional na comarca de Santiago.
