A Comisión Electoral Central da USC publicou este xoves a proclamación provisional de Rosa María Crujeiras Casais, María Teresa Flores Arias e María José López Couso como candidatas á rectoría da USC, que dirixirá por primeira vez unha muller. Doutra banda, a candidatura de Alba Nogueira quedou excluída por incumprir os requisitos establecidos, aínda que ela denunciou que se trata dunha cuestión “formalista”.
Pola súa banda, a Comisión argumentou esta exclusión en base a “un incumprimento dos requisitos establecidos”, concretamente por non acreditar correctamente os méritos alegados para ser reitora da institución. En concreto, explicou na resolución provisional que “os documentos acreditativos dos méritos alegados debían estar incorporados no expediente persoal da candidata ou candidato antes da finalización do prazo de presentación de candidaturas”.
Con todo, Nogueira denunciou que “a exclusión provisional por unha cuestión formalista, cando se cumpren os requisitos, vulnera o dereito a non presentar documentos que xa obran en poder da universidade”. “Estou moi sorprendida da decisión. Sería moi grave excluír a unha candidata porque non presentou uns certificados que obran en poder da propia Universidade, como establece a Lei do procedemento común. Os dereitos que recoñecen as leis non son un adorno”, manifestou Nogueira a través dun comunicado.
Neste contexto, anunciou que vai presentar unha reclamación para a súa “inmediata inclusión” na lista definitiva, achegando a documentación acreditativa “que xa consta en poder da USC” e insistiu en que confía en que esta situación “se resolva con normalidade canto antes”. Con todo, o 16 de decembro finaliza o prazo de recurso contra esta proclamación provisional e o 19 de decembro farase pública a proclamación definitiva das candidatas. Finalmente, a primeira volta das eleccións deberá celebrarse en febreiro e, en caso de ser necesaria unha segunda votación, efectuarase o 11 de marzo, mentres que a proclamación definitiva da reitora será o 23 de marzo.
