A Policía Nacional abriu unha investigación para aclarar as circunstancias da morte dunha muller nun domicilio da rúa Ramón Cabanillas, no Ensanche compostelán, despois de sufrir un accidente doméstico na tarde deste sábado. A vítima foi atopada por un familiar baixo unha neveira volcada no interior da vivenda.
Segundo indicou o 112, a chamada de alerta produciuse poucos minutos antes das 19:00, cando o familiar, “moi preocupado pola ausencia de resposta”, pediu asistencia médica urxente ao comprobar que a muller permanecía cunha perna atrapada e non reaccionaba. A central de emerxencias activou de inmediato o protocolo correspondente e comunicou a situación ao 061.
O equipo sanitario desprazado ao lugar só puido confirmar o falecemento da muller ao chegar ao domicilio. A gravidade do suceso levou a solicitar a intervención de patrullas da Policía Nacional e da Policía Local de Santiago, que se fixeron cargo das primeiras comprobacións.
Os axentes traballan agora na reconstrución do ocorrido para determinar como se produciu a caída do electrodoméstico e cal foi a causa exacta da morte. Como marcan os procedementos legais, recóllense datos e indicios na vivenda para esclarecer se o accidente se produciu de maneira fortuíta e en que circunstancias se atopaba a víctima no momento do suceso.
