A Real Academia Galega de Ciencias (RAGC) celebrará mañá, mércores 8 de outubro, o Día da Ciencia en Galicia, unha xornada que este ano rende tributo ao químico Fernando Calvet i Prats (Vilafranca del Penedès, 1903 – Barcelona, 1988), pioneiro da bioquímica moderna en España e impulsor da investigación química na Universidade de Santiago durante os anos 30. O acto terá lugar ás 12:00 no Salón Nobre do Colexio de Fonseca, coa presenza de representantes das principais institucións académicas e científicas galegas.
Calvet destacou como modernizador da química orgánica en Galicia e foi un dos primeiros investigadores en aplicar esta disciplina á industria, especialmente nos ámbitos farmacéutico e pesqueiro. Con só 26 anos obtivo a cátedra de Química Orgánica na USC e, tras unha estancia en Múnic con Heinrich Wieland, premio Nobel de Química, fundou en Santiago un laboratorio de prácticas e outro de investigación, situando a universidade compostelá á altura dos mellores centros do Estado.
A súa traxectoria profesional viu marcada pola Guerra Civil, que o sorprendeu en Vigo e o levou ao exilio en Estocolmo e posteriormente a Edimburgo, antes de regresar a España, onde foi encarcerado en Tui. Unha vez en liberdade, incorporouse aos laboratorios Zeltia, no Porriño, onde dirixiu un equipo que desenvolveu máis dunha decena de patentes farmacéuticas en apenas un ano. En 1944 reincorporouse á docencia universitaria, primeiro en Salamanca e Oviedo, e máis tarde en Barcelona, desde onde continuou a súa investigación e colaboración con empresas e universidades internacionais.
Durante o acto conmemorativo intervirá Manuel Freire Rama, catedrático de Bioquímica e Bioloxía Molecular da USC e académico da RAGC, quen ofrecerá a conferencia titulada “Unha semblanza da actividade científica de Fernando Calvet”. Tamén se proxectará un vídeo sobre a vida e o legado do homenaxeado.
A cerimonia contará coa asistencia do presidente da RAGC, Juan Lema, da alcaldesa de Santiago, Goretti Sanmartín, e dos reitores das tres universidades galegas, entre outras autoridades.
Como é habitual, a xornada incluirá a entrega das Medallas de Investigación de Galicia, que distinguen o labor de persoal investigador nas distintas áreas científicas. Nesta edición, os galardoados son Francisco Javier Blanco (Bioloxía e Ciencias da Saúde), Laura Carballo (Ciencias Económicas e Sociais), Juan María Pou (Ciencias Técnicas), Nieves Rodríguez (Matemáticas, Física e Ciencias da Computación) e Mª Carmen Veiga (Química e Xeoloxía).
Con este acto, a Real Academia Galega de Ciencias reafirma o seu obxectivo de difundir o coñecemento científico galego e recoñecer figuras clave como Fernando Calvet, cuxo traballo contribuiu a situar Galicia no mapa da investigación europea do século XX.
