O Museo do Pobo Galego celebrará este sábado, 25 de abril, unha xornada especial con motivo da clausura da exposición ‘MASKS. Alas y Viento Collection. Nacho Rovira II’, unha proposta centrada no universo das máscaras tradicionais e o seu valor cultural.
A programación comezará ás 12:00, cunha visita guiada pola exposición a cargo do propio coleccionista Nacho Rovira, quen ofrecerá unha aproximación ás pezas expostas e ás historias vinculadas á súa orixe e adquisición. A actividade permitirá achegarse ao contexto simbólico e etnográfico das máscaras, protagonistas da mostra.
Ás 13:00 terá lugar a presentación do libro Inverno Mágico. Ritos e Mistérios Transmontanos Volume III do investigador portugués Antonio Pinelo Tiza, unha obra que continúa o traballo de campo desenvolvido en publicacións anteriores. O volume afonda nos rituais e manifestacións culturais do territorio de Trás-os-Montes, abordando a súa continuidade e transformación na actualidade.
Durante o acto, o autor estará acompañado polo propio Nacho Rovira e pola etnógrafa, fotógrafa e documentalista sarriá Mercedes Vázquez Saavedra, nun encontro que reunirá distintas perspectivas arredor do patrimonio inmaterial do noroeste peninsular.
A xornada concluirá cun vermú no xardín do claustro do museo, concebido como un espazo de encontro aberto ao público asistente e como peche da exposición, que ao longo das últimas semanas reuniu unha selección de máscaras procedentes de diferentes tradicións culturais.
