O Concello de Santiago vén de anunciar a obtención dunha subvención europea de 14,5 millóns de euros para financiar o PAI Horizonte Compostela, un plan que ten como obxectivo a mellora da zona noroeste da cidade. A alcaldesa, Goretti Sanmartín, explicou que os recursos permitirán “impulsar unha cidade máis sustentable, accesible e inclusiva”, ao tempo que se avanza na revitalización de barrios como Almáciga, Vite e Salgueiriños, considerados de maior vulnerabilidade.
Segundo detallou Sanmartín, a iniciativa compleméntase con actuacións xa en marcha, como a reurbanización da rúa García Lorca, e con proxectos previstos, entre eles a rehabilitación de cinco edificios municipais en Caramoniña. A rexedora subliñou que esta liña de financiamento europeo encaixa na folla de ruta do goberno local: “Temos un horizonte claro e unha folla de ruta definida para mellorar a calidade de vida da xente”.
O PAI Horizonte Compostela estrutúrase en tres eixos principais. O proxecto Santiago Transforma prevé novos equipamentos sociais, culturais e deportivos, así como vivenda dotacional; Santiago Accesible céntrase na mellora integral da accesibilidade urbana; e Santiago Resiliente aborda medidas de adaptación ao cambio climático.
Estas actuacións forman parte da Axenda Urbana Santiago de Compostela (EDIL-AUS), aprobada polo pleno municipal en setembro de 2022, que fixa como prioridades o acceso á vivenda, a conservación do patrimonio natural, o fortalecemento dos ecosistemas sociais e culturais e a mellora do saneamento e abastecemento. Co desenvolvemento destes proxectos, o goberno local aspira a crear contornas máis habitables, resilientes e equitativas, contribuíndo á transformación da cidade cara a 2027 e 2031.
