O Concello de Ames puxo en marcha unha nova edición do programa de cesación de tabaco en grupo, unha actividade gratuíta dirixida a persoas empadroadas no municipio que desexen abandonar o consumo de cigarros. O proxecto desenvolverase entre outubro e decembro e forma parte do Plan Municipal para a Promoción da Saúde Mental, presentado en abril de 2024.
As sesións arrancarán o mércores 1 de outubro, ás 18:30, no Pazo da Peregrina de Bertamiráns. O programa inclúe seis encontros presenciais, conducidos por unha psicóloga con formación específica en tabaquismo, e completarase con seguimentos posteriores por teléfono.
Segundo explicou a concelleira de Promoción da Saúde, Susana Señorís, trátase da “segunda edición deste programa, que xa se desenvolveu o pasado ano co obxectivo de axudar ás persoas que queren deixar de fumar para mellorar a súa saúde e a das persoas que están ao seu arredor”.
A proposta baséase nunha abordaxe multidisciplinar e emprega un programa multicompoñente con ampla evidencia científica, contando coa colaboración doutros profesionais da saúde.
As persoas interesadas poden solicitar praza ou máis información enviando un correo a uneames@gmail.com ou chamando ao teléfono 617 485 662. O programa é de balde e está restrinxido a persoas empadroadas en Ames.
VINTE ANOS DE POLÍTICAS CONTRA O TABAQUISMO
Unha monografía coordinada pola profesora da USC Mónica Pérez Ríos analiza dúas décadas de medidas para previr e controlar o consumo de tabaco en España. O informe destaca a reducción da exposición ao fume ambiental e a desnormalización social do consumo, especialmente trala prohibición en lugares públicos e de traballo. Con todo, sinala desigualdades sociais e territoriais, xa que o descenso foi maior nos sectores con máis recursos e en comunidades con maior PIB, mentres que persisten niveis máis altos de consumo e mortalidade en territorios como Estremadura ou Andalucía. O documento tamén alerta de retos pendentes, como a publicidade encuberta en redes ou a popularización de novos produtos.
