O Concello de Santiago deu este luns un paso importante na recuperación das estatuas do Mestre Mateo, actualmente en mans da familia Franco. A alcaldesa, Goretti Sanmartín, explicou en rolda de prensa as actuacións realizadas ata o momento, incluíndo contactos coas administracións estatal e autonómica, o envío dun burofax aos propietarios actuais e a proposta dun espazo de depósito provisional para as esculturas: o Museo do Pobo Galego, no convento de San Domingos de Bonaval.
Sanmartín anunciou que o goberno local respondeu xa formalmente á familia Franco, indicándolle que, segundo a sentenza do Tribunal Supremo, debe asumir os custes e a organización do traslado das dúas esculturas atribuídas ao Mestre Mateo. Con todo, advertiu que se non hai unha resposta en tempo “prudencial”, será o propio Concello quen as traslade e reclame despois os gastos por vía xudicial.
A alcaldesa sinalou que se están a preparar todos os informes técnicos necesarios, incluíndo unha taxación, unha memoria de condicións e a contratación de seguros e transporte especializado, para garantir que o traslado se realice “coidadosamente e con seguridade”. Segundo indicou, o proceso levará varias semanas.
Como espazo de acollida inicial, o Concello propón o Museo do Pobo Galego, xa que “é un lugar público, visitable, con condicións museísticas axeitadas e un forte valor simbólico para o país”. Neste museo atópase tamén unha terceira peza adquirida conxuntamente coas estatuas en 1948, unha lauda sepulcral do século XIV que nunca pasou a mans da familia Franco e que permanece alí depositada.
Sanmartín lembrou que esta restitución “non é só patrimonial, senón tamén histórica e colectiva”, polo que avanzou a intención de organizar un acto público de recepción cando as esculturas cheguen á cidade: “Creo que debe ser unha celebración para toda a poboación galega”.
DECISIÓNS TOMADAS NA XUNTA DE GOBERNO LOCAL DE HOXE
Ademais desta cuestión, a rexedora deu conta das decisións adoptadas na Xunta de Goberno Local. Entre elas destaca o inicio das obras de mellora urbana na zona de Pontepedriña, dentro do proxecto Entre Sar e Sarela, cun investimento de 1,8 millóns de euros e un prazo de execución de sete meses. As actuacións inclúen a creación de espazos verdes, sistemas de drenaxe sostible e melloras de accesibilidade.
No ámbito urbanístico, aprobáronse licenzas para reformas de vivendas e usos terciarios, incluíndo cinco novos apartamentos turísticos en Villestro. Tamén se deu luz verde á ampliación das redes de saneamento en Aríns, cun orzamento de 35.579 euros.
En materia de subvencións, o Concello destinou máis de 82.000 euros a entidades como Médicos do Mundo, a USC, a Federación Galega de Atletismo ou o Club Ciclista Compostelán, entre outras.
Sanmartín abordou tamén o avance da nova taxa turística, que se votará definitivamente no pleno do 31 de xullo e que entrará en vigor o 1 de outubro. Defendeu a súa implantación como unha medida razoable e necesaria: “Moitas cidades europeas teñen taxas similares, é algo normalizado. Compostela ten que estar na vangarda”.
Finalmente, avanzou que o mesmo día 31 o pleno extraordinario das festas de Santiago aprobará os recoñecementos da Alba de Compostela, que este ano homenaxeará á médica Charo Rúa, ao ferreiro Chago Martínez, á cantareira Aurora da Freira e ao taberneiro Suso do Dezaseis, como representantes da diversidade e identidade da cidade.
