A chegada de xullo marcou, un ano máis, o inicio dunha das etapas máis difíciles para milleiros de estudantes en Santiago de Compostela: a busca de piso para o vindeiro curso académico. Porén, nesta ocasión, a situación vese agravada por un incremento sen precedentes nos prezos do alugueiro, colas dende primeira hora nas inmobiliarias e unha oferta escasa, con vivendas que, segundo denuncian colectivos como Sumar Terras de Compostela, presentan condicións “insalubres” e importes que superan os mil euros.
A organización sinala que a capital galega cumpre todos os requisitos establecidos pola Lei estatal de Vivenda para ser declarada zona tensionada, e insta á Xunta de Galicia a emitir de inmediato o informe favorable que recoñeza esta realidade. O Concello xa solicitou esta declaración, mais o goberno autonómico, encabezado por Alfonso Rueda, mantén o silencio. “O retraso na declaración é un acto político que prioriza intereses especulativos e turísticos fronte ás necesidades reais da xente”, afirman dende Sumar.
Segundo datos do Instituto Galego de Estatística, máis do 30 % da poboación moza residente en Santiago vese na obriga de marchar a concellos limítrofes como Teo, Ames ou Brión, onde os prezos tamén están a medrar. Este desprazamento da veciñanza, especialmente da mocidade, está vinculado ao que Sumar identifica como un modelo de cidade baseado no turismo masivo, a proliferación de residencias privadas e a especulación inmobiliaria, promovido polo Partido Popular.
“Séguense a converter os pisos en hoteis e os barrios en escaparates turísticos. A cidade perde alma, perde veciñanza e perde dereitos”, advertiu Luisa Pasín, voceira do grupo. A situación afecta especialmente ao colectivo estudantil, que se ve expulsado por non poder competir coas rendas do mercado. “Pisos con humidades, sen luz natural ou con espazos improvisados por máis de mil euros ao mes. Xa non queda sitio para estudar nin vivir con dignidade en Santiago”, engadiu.
Sumar defende un modelo de cidade pensado para quen a habita, non para quen a visita. “Cremos que as cidades deben ser para quen as viven”, concluíu Pasín, reclamando unha resposta inmediata por parte da Xunta para frear a degradación da vida residencial en Compostela.
