A Policía Nacional detivo no aeroporto Rosalía de Castro de Santiago a Gerelys Sánchez-Reyes, unha muller de 28 anos e nacionalidade dominicana que se atopaba en busca e captura internacional por ser a principal sospeitosa dun asasinato en Filadelfia (EE.UU.). A detención tivo lugar este pasado xoves, cando a muller se atopaba na zona de embarque, a piques de coller un voo con destino a Bruxelas.
Segundo confirmaron fontes policiais, Sánchez-Reyes estaba reclamada pola xustiza estadounidense por presuntamente asasinar a Yuleisy Torrelles Martínez, unha moza venezolana de 21 anos e bailarina profesional. O corpo da vítima foi localizado o 5 de abril no seu apartamento de Frankford Avenue, en Filadelfia, oculto no interior dun sofá cama e envolto nunha cortina de baño. A autopsia confirmou que morrera por múltiples coiteladas no pescozo e no peito.
A captura da presunta autora do crime foi posible grazas a un aviso cidadán recibido hai máis de dous meses na Comisaría de Santiago, que indicaba que a muller podería estar na cidade ou nos seus arredores. A Policía abriu unha investigación discreta e comezou a seguir os seus movementos, comprobando que a identidade coincidía coa da persoa buscada. O operativo contou coa participación de axentes de seguridade cidadá e do coordinador de servizos da comisaría compostelá.
O xoves 26, a sospeitosa colleu o autobús urbano da liña 6A na rúa do Hórreo cara ao aeroporto. Unha vez alí, e tras confirmarse a orde de detención vía Interpol e a Audiencia Nacional, os axentes procederon ao seu arresto cando xa se atopaba na pista, a piques de embarcar. En ningún momento ofreceu resistencia nin portaba armas. Pasou varias horas en dependencias policiais antes de que se decretase o seu ingreso en prisión provisional, á espera da súa extradición aos Estados Unidos, onde será xulgada polo presunto homicidio.
As investigacións das autoridades estadounidenses apuntan a que Sánchez-Reyes tamén traballaba como bailarina e que probablemente coñeceu á vítima no mesmo ámbito profesional. A última vez que Yuleisy foi vista con vida, estaba acompañada pola agora detida. As imaxes das cámaras de seguridade e as declaracións recollidas permitiron vincular a Sánchez-Reyes co crime.
Tralo crime, a familia da vítima solicitou a repatriación dos restos, que foron incinerados e enviados a Venezuela. A nai de Yuleisy, Magaly Torrelles, afirmou nunha entrevista televisiva que agora se sente “un pouquiño máis tranquila porque apresaron á asasina”, aínda que lamenta: “Non vou volver ver á miña filla e iso dóeme moito”.
Dende o Sindicato Unificado de Policía (SUP), o máis representativo en Galicia, solicitouse que se recoñeza o labor dos axentes que participaron na detención. As autoridades policiais destacan o papel esencial da colaboración cidadá nesta operación e lembran que os Estados Unidos ofrecía unha recompensa de 20.000 dólares por calquera información que axudase a localizar á sospeitosa.
