O presidente do Partido Popular de Santiago, Borja Verea, aproveitou este domingo a súa participación no proceso interno do PP estatal para expresar o seu apoio á continuidade de Alberto Núñez Feijóo á fronte do partido e reiterar o obxectivo da formación local de “acadar o goberno da cidade en 2027”. Verea acudiu á sede do PP compostelán acompañado da secretaria xeral do PPdeG, Paula Prado, para emitir o seu voto.
Desde a sede local, o líder popular asegurou que o partido en Santiago está a traballar “para consolidar esa forza de cambio que naceu en 2023 e que hoxe é un clamor na cidade”. Nesa liña, afirmou que o actual goberno municipal, integrado por BNG, PSdeG e Compostela Aberta, supón “un freo para o progreso de Compostela”.
Verea criticou a falta de avances en temas como o novo contrato do transporte urbano, que cualificou de “borrón e conta nova con 10 anos de retraso”, e a situación do contrato da auga, do que “nada se sabe”, segundo indicou. Tamén denunciou o estado xeral da cidade, que describiu como “completamente desmantelada”.
O portavoz popular incidiu na súa estratexia de presentar o PP como alternativa de goberno, facendo fincapé no que denominou “clamor” cidadán por un cambio. “As urxencias seguen sendo as mesmas desde hai anos”, declarou, e reivindicou a súa formación como única capaz de dar unha resposta “de progreso para todos os santiagueses”.
Durante a súa intervención, o líder popular compostelán tamén aproveitou para lanzar unha mensaxe a nivel estatal, defendendo que “é o momento da decencia, do sentido común e da gobernabilidade”, e vinculando ese espírito coa figura de Feijóo, a quen referiu non só como presidente do partido senón como “próximo presidente do Goberno”.
Verea concluíu sinalando que, ao seu xuízo, BNG e PSOE actúan como unha soa forza política. “Sempre se necesitan, e o mellor exemplo témolo en Santiago, onde o BNG con só 6 concelleiros está gobernando co apoio do PSOE de Pedro Sánchez”, afirmou.
