Tanxugueiras protagonizaron este xoves 29 de maio o momento máis esperado do día grande das Festas da Ascensión en Santiago de Compostela, cun concerto multitudinario na Praza da Quintana que obrigou a pechar o acceso ante o desbordamento de público. A actuación do trío, composto por Olaia Maneiro, Aida Tarrío e Sabela Maneiro, volveu confirmar a súa conexión co público local, tres anos despois da súa última presenza no mesmo escenario durante a reapertura das festas tras a pandemia.
O concerto, que comezou ás 21:00 horas, incluíu momentos emotivos e colaboracións especiais, como a interpretación conxunta de Ghatiña mansa xunto ao dúo Caamaño & Ameixeiras, unha das sorpresas da noite. O trío fixo tamén unha chamada explícita á defensa da lingua galega e ao valor das súas raíces musicais: “Falade galego, loitemos por el”, proclamaron desde o escenario, tras agradecer o apoio do público e reivindicarse como cantareiras.
Durante o día, a cidade viviu unha intensa programación marcada pola tradición, a música e a participación cidadá. A xornada comezou coas notas da Alborada da A.C. Devagariño, que deron paso ao concerto da Banda Municipal de Música acompañada da OCT Ultreia ao mediodía na Quintana. A Feira Cabalar no recinto de Amio foi outro dos puntos álxidos da mañá, cunha gran afluencia de visitantes e competicións puntuables para a Copa Galicia da pura raza galega.
Pola tarde, o protagonismo pasou á música folk nas rúas do casco histórico, con actuacións de agrupacións tradicionais como Brincadeira, Cantigas e Agarimos ou a Colexiata de Sar, que levaron os seus ritmos polas prazas de Santo Agostiño, Toural ou Obradoiro, até reunirse en Praterías nunha actuación conxunta. En paralelo, a Real Filharmonía de Galicia actuaba no Auditorio de Galicia ás 20.30 horas, ofrecendo unha alternativa de corte clásico nunha xornada dominada pola diversidade musical.
Os Cabezudos volveron converterse nun reclamo interxeracional que percorreu as rúas da zona vella seguidos por crianzas e familias, nun desfile que mantén viva unha das tradicións máis queridas destas festas. O polbo, coma sempre, foi protagonista nas casetas da Alameda, onde non faltaron representantes de todas as forzas políticas, desde membros do goberno municipal ata líderes da oposición.
