Parte do falso teito das galerías de Fernando III O Santo, coñecidas por albergar algúns dos principais ximnasios da cidade, desprendeuse durante a madrugada deste xoves, provocando a inundación da entrada. Non entanto, non causou danos persoais. O suceso, confirmaron os Bombeiros de Santiago, produciuse sobre as 01.20 horas da mañá, momento no que recibiron un aviso no que se informaba da ruptura dunha tubaxe, que provocou a caída dunha parte do falso teito. Á súa chegada, a Policía Local xa cortara a auga.
Segundo informou un traballador de Tempos e Menssana —centro de actividades deportivas—, este incidente provocou a inundación do interior do local “que é ben longo” chegando a auga “ata as salas do fondo”. Así mesmo, comunicou que a auga viña cunha especie de barro que lles obrigou a pasarse unhas cinco horas fregando e achicándoa do local con axuda dalgúns traballadores que se uniron. Aínda así, avanzan, o chan irase levantando nas próximas semanas.
Tamén o ximnasio Espagat trasladou que a auga chegou ao soto do local, alcanzando incluso a piscina, polo que tiveron que pasarse “todo o día do traballador” achicándoa. Ademais, informaron de que o pasado mércores detectaron unha pingueira no teito e o levantamento dunha parte da placa, polo que puxeron un cubo de auga por prevención. Debido a que foi en plena madrugada, non houbo ningunha persoa ferida. En esta liña, a recepcionista do Espagat asegurou aliviada que “menos mal”, porque se chega a ser ás 18.00 da tarde esa zona “está chea de nenos”.
Actualmente o ximnasio Synergym atópase coa auga cortada polo incidente, xa que no momento que a activaron comezou a caer de novo mollando a zona de paso. Os administradores das galerías aseguraron, pola súa parte, que descoñecían este suceso.
