Un home foi detido este luns en Santiago de Compostela como presunto autor de oito roubos con forza en establecementos comerciais da cidade. A súa captura produciuse tras unha persecución policial, que se iniciou despois dun roubo nun local de restauración e culminou coa súa interceptación cando intentaba fuxir.
Segundo informou a Policía Nacional, o detido foi localizado logo de cometer un roubo arredor das 10:30 horas deste luns. Para acceder ao establecemento, utilizou unha tapa de sumidoiro para fracturar o cristal e, unha vez dentro, subtraeu o diñeiro da caixa rexistradora.
Os axentes iniciaron a súa busca e localizárono a bordo dun taxi. Ao decatarse da presenza policial, baixou rapidamente do vehículo e intentou fuxir a pé, pero foi interceptado pouco despois. No momento da detención, levaba consigo unha cantidade de diñeiro similar á sustraída no roubo, algo máis de 400 euros, así como luvas e unha mochila.
VINCULACIÓN CON OUTROS ROUBOS NA CIDADE
A Brigada Local de Policía Xudicial da Comisaría compostelá atribúelle ao detido a presunta responsabilidade doutros sete roubos recentes en locais da cidade. Todos eles foron cometidos mediante o mesmo modus operandi, baseado na forza para acceder aos establecementos e subtraer diñeiro en efectivo.
O home pasou este martes a disposición do Xulgado de Garda de Santiago de Compostela.
A Policía reiterou a importancia da colaboración cidadá para a prevención deste tipo de delitos. Nun comunicado, solicitaron que, ante calquera sospeita de roubo ou actividade delituosa, se avise de inmediato a través do 091 ou do 112, co obxectivo de permitir unha resposta rápida e mellorar a seguridade na cidade.
