O propietario dun establecemento de Santiago de Compostela foi proposto para sanción por permitir o consumo de substancias estupefacientes dentro do seu local durante un dispositivo desenvolvido pola Policía Nacional en espazos de lecer da cidade.
Segundo informou o Ministerio do Interior, a actuación tivo lugar durante a madrugada do pasado venres no marco dun operativo dirixido á prevención do consumo de drogas en locais de lecer.
No dispositivo participaron arredor de 40 axentes da Policía Nacional, que realizaron inspeccións administrativas en varios establecementos. Entre outras cuestións, os efectivos comprobaron que os locais contasen cos permisos e autorizacións necesarios para desenvolver a súa actividade.
Ao longo da intervención, os axentes procederon á identificación de aproximadamente 170 persoas. Como resultado das comprobacións realizadas, catro delas foron propostas para sanción por posesión de substancias estupefacientes.
O operativo deixou tamén dúas propostas de sanción por desobediencia e outra por posesión dunha arma branca, segundo os datos facilitados polo Ministerio do Interior.
Ás propostas tramitadas contra particulares súmase a dirixida contra o propietario dun dos establecementos inspeccionados, ao considerar os axentes que permitía o consumo de substancias estupefacientes no interior do local.
