A Escola Municipal de Música de Ames continúa coas actividades conmemorativas do seu 20º aniversario, nesta ocasión coa organización dun obradoiro de batucada que terá lugar os días 15, 22 e 29 de marzo, en horario de 11.00 a 13.00 horas. O obradoiro será impartido pola Asociación Cultural Trópico de Grelos e permitirá aos participantes aprender os instrumentos de percusión desta modalidade musical nun ambiente divertido e dinámico.
O obradoiro conta con 25 prazas dispoñibles e terá preferencia o alumnado da Escola de Música maior de 8 anos. No caso de que quedasen prazas vacantes, a participación abrirase ao público xeral. Para inscribirse é preciso enviar a ficha de inscrición cuberta ao correo electrónico escolademusica@concellodeames.gal.
A actividade require asistencia ás tres xornadas, xa que o 29 de marzo pola tarde está prevista unha saída polas rúas de Bertamiráns para mostrar ao público o aprendido durante as sesións formativas. A iniciativa forma parte do compromiso da Escola de Música de Ames por fomentar a participación cultural e musical na comunidade.
