O Concello de Santiago presentou este martes o seu plan para acceder á senda financeira FEDER a través do proxecto ‘Horizonte Compostela’, co que aspira a obter 12 millóns de euros de financiamento. A proposta ten como obxectivo transformar a zona noroeste da cidade, especialmente os barrios da Almáciga e Vite – Guadalupe, onde se identificaron indicadores de vulnerabilidade socioeconómica.
A alcaldesa de Santiago, Goretti Sanmartín, destacou que os fondos solicitados complementarán unha achega municipal de 8 millóns de euros, destinándose a actuacións xa en marcha e proxectos previstos para a zona.
TRES EIXOS ESTRATÉXICOS
O plan estrutúrase en tres grandes proxectos:
- ‘Santiago Transforma’, cun orzamento de 9,6 millóns de euros, prevé a creación de novos equipamentos sociais, culturais e deportivos para reducir desigualdades na dotación de infraestruturas. Inclúe a construción da Factoría Moza en Salgueiriños e un equipamento deportivo na súa contorna, ademais das vivendas piloto de Caramoniña.
- ‘Santiago Accesible’, cun investimento de 7 millóns de euros, busca mellorar a mobilidade urbana mediante a instalación dun elevador na rúa do Pino e a reurbanización da Praza de Ultreia para crear un espazo máis accesible e verde.
- ‘Santiago Resiliente’, dotado con 3,35 millóns de euros, centrase en melloras na xestión da auga e loita contra a emerxencia climática, incluíndo a rehabilitación do colector de pluviais da Avenida de Lugo para reducir inundacións.
PLAN DE EXECUCIÓN ATA 2029
A iniciativa será presentada ao Consello Económico e Social antes de formalizar a solicitude nos próximos días. A Unión Europea terá un prazo de seis meses para comunicar a concesión dos fondos, e a execución do proxecto estenderase ata decembro de 2029.
A tenenta de alcaldesa, María Rozas, subliñou que este plan supón unha “nova oportunidade para transformar Santiago” e destacou a súa integración en criterios sociais e ambientais. Ademais, sinalou que a previsión do goberno municipal é alcanzar a asignación máxima de 20 millóns de euros para materializar todas as accións previstas no proxecto.
