A Concellaría de Dereitos e Servizos Sociais, Promoción Económica e Xuventude do Concello de Santiago puxo en marcha unha nova edición dos Orzamentos Participativos de Mocidade, coa apertura do prazo para a presentación de propostas. Este proceso, que conta cunha partida de 100.000 euros, busca fomentar a participación cidadá e a implicación directa dos mozos e mozas nas decisións municipais.
A presentación de propostas está aberta a persoas de todas as idades, sempre que as actividades suxeridas estean dirixidas á mocidade. As iniciativas poden formularse a través do formulario dispoñible na plataforma municipal decide.santiagodecompostela.gal. As propostas deben cumprir certos requisitos: ser viables tecnicamente, de interese xeral, estar dentro das competencias municipais e non superar os 15.000 euros de orzamento por actividade.
A tenente de alcaldesa, María Rozas, animou á participación, destacando que “é fundamental que a mocidade teña un papel activo nas decisións que lles afectan”. A concelleira sinalou tamén que os orzamentos participativos están xa “consolidados en moitos municipios” e lembrou o éxito da edición anterior, na que se incrementou a participación nun 420% respecto a 2019.
Unha vez avaliadas e validadas as propostas presentadas, a fase de votación terá lugar no mes de marzo. Neste punto, só poderán votar os mozos e mozas nacidos entre 1995 e 2009, empadroados en Santiago ou que acrediten documentalmente estudar ou traballar no municipio.
Na última edición, presentáronse 286 propostas, das que finalmente se votaron 103 tras a agrupación e validación técnica. As propostas máis destacadas incluíron iniciativas relacionadas co cine, a música, o benestar animal e a saúde. O proceso contou con case 1.200 participantes, demostrando o interese crecente por parte da xuventude compostelá.
Con esta nova edición, o Concello busca seguir consolidando este espazo de participación activa e implicar aínda máis á cidadanía máis nova no deseño de proxectos que enriquezan a vida comunitaria en Santiago.
