Os Reis Magos desprazáronse este venres polas parroquias da “parte alta” de Brión, onde foron recibidos con entusiasmo polos veciños. Acompañados polo son da charanga Os Celtas de Negreira e a bordo dun autobús de época, Melchor, Gaspar e Baltasar entregaron lambonadas aos máis pequenos e escoitaron as súas peticións, nunha mañá marcada pola calor humana e a degustación de rosca, chocolate quente e churros.
A choiva, como xa ocorrera o ano pasado, obrigou a reorganizar os actos previstos para a tarde. As recepcións programadas para as parroquias con maior afluencia de persoas foron trasladadas ao centro social polivalente de Brión, onde familias de San Xulián de Bastavales, San Salvador de Bastavales, Os Ánxeles e Brión puideron acudir para compartir o espírito do Nadal cos Reis.
Durante a mañá, a comitiva real fixo paradas en Cornanda, Luaña, Viceso e Ons, incluíndo unha visita especial á residencia de maiores Servisenior Brión. O alcalde de Brión, Pablo Lago Sanmartín, e as concelleiras de Cultura, Sandy Cebral, e Servizos Sociais, Rosa Romero, encabezaron o percorrido, acompañando aos Reis Magos mentres atendían aos nenos e repartían ilusión.
Cada familia desfrutou tamén dunha animación musical a cargo de Os Celtas de Negreira, que amenizou a espera nas distintas localidades.
A adaptación das visitas ao centro social polivalente asegurou que ningunha familia quedase sen a oportunidade de saudar aos Reis Magos nesta data sinalada. Este acto, consolidado no Nadal de Brión, volveu unir á comunidade en torno á tradición e á maxia propia destas datas, a pesar das condicións meteorolóxicas adversas.
