O Ateneo de Santiago celebrou este luns a entrega do Premio de Xornalismo Cívico Alfredo Vicenti 2024. Nesta edición, o recoñecemento principal foi para Marta Otero Mayán pola súa reportaxe ‘Somos las esclavas de este siglo’, publicada en La Opinión de A Coruña o 3 de marzo. Ademais, entregouse unha mención honorífica a Ángel Paniagua Pérez polo traballo ‘El ‘chemsex’ dispara las infecciones sexuales’, publicado en La Voz de Galicia o 26 de novembro de 2023.
UN XORNALISMO NECESARIO
O acto foi inaugurado polo presidente do Ateneo de Santiago, Francisco Candela, quen destacou a alta calidade dos traballos presentados e a dificultade do xurado para escoller os premiados. Pola súa banda, Antón Porteiro, da Sección Sociedade da Información, deu lectura á acta de concesión do galardón.
Durante a súa intervención, o representante da Facultade de Ciencias da Comunicación da USC, Xosé Ramón Pousa, eloxiou os galardoados como parte dunha nova xeración de xornalistas “preparados, ben formados e comprometidos coa profesión”. Pousa reflexionou sobre a importancia da reportaxe xornalística, definíndoa como unha ferramenta fundamental que vai máis alá da noticia simple para ofrecer información rigorosa e profunda, pese a ser un formato que require máis recursos e tempo. Segundo afirmou, “se perderon moitas das virtudes do xornalismo tradicional, pero a súa esencia segue viva e necesaria, sobre todo para dar voz aos colectivos máis vulnerables”.
Tras recibir o premio, Marta Otero Mayán agradeceu ao Ateneo a súa sensibilidade ao valorar unha temática como a das traballadoras migrantes, destacando as súas condicións precarias no ámbito dos coidados e do traballo doméstico. A xornalista tamén sinalou os desafíos actuais da profesión: “Cada vez é máis difícil facer o xornalismo que predicaba Alfredo Vicenti polas novas dinámicas de consumo de información e as presións externas”.
Pola súa banda, Ángel Paniagua Pérez reflexionou sobre o concepto de xornalismo cívico, indicando que debería ser un principio inherente a toda práctica xornalística. Con todo, lamentou que hoxe en día “prima o entretemento en detrimento da información e da formación, diluíndo o valor cívico que debe caracterizar ao xornalismo”.
O evento concluíu coas palabras do presidente do Ateneo, Francisco Candela, que felicitou aos premiados e agradeceu a participación dos asistentes, reafirmando o compromiso da entidade coa promoción dun xornalismo ético e ao servizo da sociedade.
