Dúas persoas faleceron, unha muller de 33 anos (LBF) e un home de 34 anos (JFR), e tres resultaron feridas –unha delas de gravidade-– nun accidente con tres vehículos implicados no municipio coruñés de Vedra, ocorrido na noite do pasado xoves.
Segundo informa o 112 Galicia, o suceso tivo lugar ao redor das 23:20 horas no quilómetro 323 da N-525, á altura da parroquia de Santa Cruz de Ribadulla, onde tres vehículos resultaron implicados nunha colisión de consecuencias fatais.
O 112 informou de que varios particulares alertaron sobre a gravidade do sinistro e advertiron que había persoas atrapadas nos vehículos. Os equipos de emerxencias do GES da Estrada tiveron que intervir para liberar os corpos sen vida dos condutores de dous dos automóbiles implicados, un home e unha muller, que faleceron tras un choque frontal. Nun dos coches viaxaba unha terceira persoa, que foi trasladada en estado grave, mentres que os dous ocupantes do terceiro vehículo tamén sufriron feridas.
A intervención de diversos equipos de emerxencias foi inmediata. Desde a central de emerxencias solicitouse a asistencia do 061, do GES da Estrada, da Garda Civil de Tráfico e dos servizos de mantemento da estrada para controlar a situación e facilitar a circulación na zona. Ademais, notificouse ao Grupo de Intervención Psicolóxica en Catástrofes e Emerxencias (Gipce), do Colexio Oficial de Psicoloxía de Galicia, para que estivesen dispoñibles en caso de necesidade de apoio psicolóxico aos familiares dos falecidos.
