O Concello de Brión aprobou este mediodía, nunha sesión plenaria extraordinaria, a adquisición de cinco parcelas para a construción de vivenda protexida e libre, mediante un expediente de modificación de créditos que inclúe un crédito extraordinario de 164.560 euros. A operación foi financiada a través do Remanente Líquido de Tesourería e recibiu o respaldo do grupo de Goberno, mentres que o PP e o BNG se abstiveron.
O alcalde de Brión, Pablo Lago, detallou que estas parcelas, propiedade do SAREB e valoradas en 500.000 euros cada unha, poderán ser adquiridas por 34.000 euros cada unha, unha oportunidade que considerou especialmente favorable dado o contexto de escaseza de vivenda. “Entendemos que esta operación é moi vantaxosa para o concello, pois facilita a creación de vivenda protexida, unha necesidade non cuberta ata agora en Brión, e ao mesmo tempo pode xerar retorno económico coa licitación das parcelas libres”, explicou Lago.
En canto á convocatoria extraordinaria do pleno, o alcalde sinalou a urxencia de resolver a adquisición debido aos prazos administrativos: “Non podiamos agardar ao pleno ordinario de decembro, dado que aínda temos que completar todo o proceso administrativo”, aclarou Lago, destacando ademais que “o prezo das parcelas é máis que razoable e responde á necesidade de ampliar a oferta de vivenda protexida no municipio”.
No pleno tamén se aprobou a acta da sesión anterior, do pasado 16 de outubro, e analizáronse os informes de cumprimento de obrigas trimestrais sobre a execución do orzamento e o período medio de pago (PMP), que se situou en 28,59 días para o terceiro trimestre de 2024, cumprindo así cos prazos establecidos.
