A Xunta de Goberno Local de Ames aprobou o pasado xoves, 31 de outubro, a Oferta de Emprego Público (OEP) 2024, que inclúe un total de 15 prazas para cubrir vacantes na plantilla municipal. A proposta, que deberá publicarse no Boletín Oficial da Provincia (BOP), contempla 13 prazas para a quenda libre e 2 para promoción interna, así como postos destinados a persoas con discapacidade, segundo o orzamento deste ano.
Entre as prazas ofertadas para a quenda libre, hai 6 postos de persoal laboral e 9 de persoal funcionario. Estas inclúen 1 praza de peón de limpeza viaria, 5 de auxiliar administrativo/a, 1 de administrativo/a, 1 de policía local, 1 de arquitecto/a técnico e 4 prazas de profesorado en disciplinas musicais (percusión/batería, violín, frauta e saxofón).
En canto á promoción interna, a oferta inclúe dúas prazas: unha de administrativo/a e outra de conserxe de centro de ensino.
O concelleiro de Administración Xeral, Víctor Fernández, explicou que esta oferta “recolle as prazas vacantes que están consignadas nos Orzamentos de 2024, permitindo así reforzar as áreas necesarias e dar cabida á promoción interna e á quenda de discapacidade”.
