Un home e unha muller resultaron feridos este mércores tras unha colisión frontal entre dous vehículos na parroquia de Reis, en Teo. Ambos foron trasladados ao Hospital Clínico de Santiago para recibir atención médica, segundo informaron fontes de Protección Civil.
O accidente tivo lugar arredor das 14:15 horas no quilómetro 9 da estrada AC-841. Un particular contactou co 112 para alertar do sinistro, indicando que un dos ocupantes dos vehículos implicados precisaba asistencia sanitaria. A pesar de que inicialmente se sinalou que un dos feridos estaba atrapado no interior dun dos coches, finalmente non foi necesaria a excarceración.
Ao lugar do accidente mobilizáronse efectivos do 061, os bombeiros de Ordes, o GES da Estrada, a Garda Civil de Tráfico, a Policía Local e o Servizo Municipal de Protección Civil de Teo, ademais de persoal de mantemento da estrada para asegurar a zona.
