Este pasado martes un coche ardeu nas proximidades do monte Viso, preto da Cidade da Cultura, despois de que o condutor detectase fume saíndo do seu vehículo mentres circulaba pola AP-9 en dirección á Coruña. Segundo informaron os bombeiros de Santiago, o condutor, posiblemente nervioso pola situación, optou por saír da autopista pola saída da Cidade da Cultura e meterse por unha pista que leva á senda mitolóxica.
Malia lograr abandonar o coche a tempo e saír ileso, o vehículo foi completamente calcinado polas chamas. Ademais, o incendio afectou a unha parte do monte. Os bombeiros explicaron que, debido á localización do coche nunha zona de difícil acceso, non puideron chegar a tempo para evitar que o coche ardese por completo. Na extinción do lume participou tamén unha brigada forestal do 085.
As chamas, visibles desde a autopista, alarmaron a varios condutores que circulaban pola AP-9, o que provocou numerosas chamadas de alerta. A rápida actuación dos servizos de emerxencia permitiu controlar o incendio antes de que se estendese por máis zonas do monte.
