O corpo sen vida dunha persoa foi localizado este luns pasadas as 8 da tarde nunha canteira situada en Santa María da Peregrina, en Santiago de Compostela. Segundo informou o 112, a persoa permanecía en paradoiro descoñecido desde o mediodía do luns.
O achado produciuse nas proximidades do domicilio da persoa, tras unha intensa busca por parte dos servizos de emerxencias. A central de emerxencias foi alertada da desaparición e iniciou un operativo de localización que concluíu co triste desenlace na citada canteira.
Segundo ralatou a veciñanza da parroquia, o mozo, de tan só 30 anos de idade, saíra pola mañá para dar un paseo. Cando este non regresou, a familia presentou unha denuncia por desaparición.
As autoridades competentes encargaranse agora de investigar as circunstancias que rodean o falecemento. Segundo indican as fontes policiais a partir das primeiras investigacións, a morte puido producirse por unha caída a grande altura, posiblemente dende a maquinaria indutrial que está presente na canteira abandonada. Porén, as causas exactas da súa morte aínda non foron confirmadas.
