Unha persoa resultou ferida nunha colisión entre dous vehículos na estrada DP-8203, ao seu paso pola parroquia compostelá de Marrozos. Segundo informou o 112 Galicia, o ferido tivo que ser trasladado en helicóptero ao Complexo Hospitalario Universitario de Santiago despois de ser excarcerado polos servizos de emerxencias.
O accidente produciuse arredor das 13:20, momento no que un particular alertou ao 112, sinalando que un dos vehículos implicados quedara envorcado e que unha persoa estaba atrapada no seu interior. Ante esta situación, os operadores do 112 solicitaron a intervención dos servizos sanitarios, así como dos Bombeiros de Santiago para liberar á vítima.
Tamén se puxeron os feitos en coñecemento da Garda Civil de Tráfico, da Policía Local e da Agrupación de Voluntarios de Protección Civil de Santiago de Compostela.
Á chegada dos Bombeiros a Marrozos, confirmaron a información proporcionada polo particular e utilizaron material de excarceración para liberar ao ferido do interior do vehículo. Unha vez liberada, a persoa foi trasladada en helicóptero medicalizado ao CHUS.
A Policía Local solicitou a intervención do servizo de mantemento da vía para retirar os restos do accidente e asegurar a zona.
