Oito persoas resultaron feridas nun accidente múltiple con tres vehículos implicados en Santiago de Compostela. As oito tiveron que ser trasladadas ao hospital Rosaleda para un mellor exame, aínda que a maioría xa recibiu a alta. Entre os feridos están o alcalde de Tui, Enrique Cabaleiro; a alcaldesa de Salvaterra de Miño, Marta Valcárcel; e a alcaldesa do Rosal, Ánxela Fernández.
Os rexedores viaxaban nun dos vehículos xunto a outros membros da Agrupación Europea de Cooperación Territorial (AECT) Río Miño cando volvían dunha reunión. Segundo informou o 112, o suceso tivo lugar esta tarde na AP-9, ao seu paso pola capital galega, e nel víronse implicados un camión, unha furgoneta e un turismo.
O servizo de emerxencias recibiu a primeira chamada de alerta ás 14.30 horas. Foron varios os particulares que contactaron co 112 para informar da colisión múltiple, concretamente no quilómetro 72 da autoestrada. Ao lugar desprazouse o 061, os Bombeiros de Santiago de Compostela, a Garda Civil de Tráfico, a Policía Local e efectivos de Protección Civil. Así mesmo, tamén foi alertado o Grupo de Intervención Psicolóxica en Catástrofes e Emerxencias (GIPCE), por se fose necesaria a súa intervención.
