Unha explosión rexistrada na cociña dunha vivenda da rúa das Salvadas provocou este luns un incendio que se saldou con danos materiais de consideración na estancia afectada, sen que se producisen feridos.
Segundo confirmaron fontes dos servizos de emerxencia, a orixe do suceso estivo na deflagración dunha bombona dun soplete de cociña, que desencadeou o lume no interior da vivenda. Ata o lugar desprazáronse efectivos dos Bombeiros de Santiago, así como axentes policiais e persoal sanitario.
Na vivenda reside un home que se atopaba no inmoble no momento dos feitos. As fontes consultadas indicaron que non sufriu lesións e que se atopa en bo estado, malia a explosión inicial e ao posterior incendio.
Dende o Concello de Santiago sinalaron que o lume provocou importantes danos na cociña, aínda que a súa incidencia quedou limitada a esa zona da vivenda e non chegou a afectar de maneira relevante ao resto do edificio.
As mesmas fontes destacaron que non foi necesario evacuar outros residentes do inmoble, ao non existir risco para as persoas que se atopaban noutras vivendas. Os servizos de emerxencia lograron controlar a situación sen que se rexistrasen consecuencias persoais.
