Catro novos de entre 23 e 25 anos resultaron feridos leves na noite deste pasado domingo tras sufrir unha saída de vía co turismo no que viaxaban na AP-9, ao seu paso polo municipio de Santiago de Compostela.
O accidente produciuse sobre as 22.15 horas no quilómetro 58 da autoestrada, en sentido Santiago, concretamente na zona de Marantes. Segundo informaron varios particulares ao 112 Galicia, o vehículo patinou, atravesou a mediana e terminou nos carrís do sentido contrario da marcha.
Urxencias Sanitarias de Galicia-061, tras recibir a alerta ás 22.19 horas, mobilizou unha ambulancia asistencial de soporte vital avanzado (SVA), dúas de soporte vital básico (SVB) e persoal sanitario da PAC de Santiago. Os servizos sanitarios atenderon ao catro ocupantes: un mozo de 23 anos, outro de 24 e dous homes de 25 anos. Todos eles foron trasladados ao Hospital Clínico Universitario de Santiago.
No operativo de emerxencia tamén participaron efectivos da Garda Civil de Tráfico, os Bombeiros de Santiago e operarios de conservación da autoestrada.
