A titular da Sección de Violencia sobre a Muller do Tribunal de Instancia de Santiago, praza 1, decretou a liberdade con medidas cautelares para o home detido na capital galega como presunto autor dunha agresión sexual cometida no interior dun autobús urbano. Segundo trasladaron fontes do Tribunal Superior de Xustiza de Galicia, o investigado queda sometido á prohibición de aproximación e comunicación coa vítima mentres continúa o procedemento xudicial aberto por un presunto delito de agresión sexual.
Os feitos remóntanse ao domingo 3 de maio, arredor das 20:30, cando, de acordo coa información facilitada pola Policía Nacional, o home aproveitou que a muller viaxaba soa no vehículo, sen presenza doutros pasaxeiros, para achegarse a ela e dirixirlle comentarios de carácter obsceno.
Segundo a investigación policial, o sospeitoso realizou posteriormente tocamentos por distintas partes do corpo da vítima no interior do autobús. A muller conseguiu finalmente liberarse e solicitou axuda ao condutor do transporte público, que alertou de inmediato ás forzas de seguridade.
Tras a chamada de aviso, o presunto agresor abandonou o lugar, aínda que foi localizado pouco despois nas inmediacións por axentes da Policía Local, que procederon á súa identificación. A detención foi practicada posteriormente por efectivos da Policía Nacional, que asumiron a investigación do caso.
