Un operario resultou ferido este martes pola mañá tras sufrir unha caída dende unha estada mentres realizaba traballos no barrio compostelán de Vista Alegre. O suceso obrigou á mobilización dos servizos de emerxencia e rematou co traslado do traballador ao centro hospitalario.
Segundo a información facilitada polo servizo de emerxencias, o 112 recibiu o aviso ás 9:10 horas, cando un particular alertou da presenza dun home que caera dende unha estada na rúa Arturo Cuadrado Moure. Na chamada indicábase que o operario se atopaba inconsciente e precisaba asistencia sanitaria inmediata.
Tras recibir o aviso, o 112 activou un operativo no que participaron efectivos de Urxencias Sanitarias e da Policía Nacional, que se desprazaron ata o lugar dos feitos para atender a situación e garantir a seguridade na zona.
Finalmente, o traballador foi evacuado ao Hospital Clínico Universitario de Santiago, onde foi atendido polos servizos médicos. Polo momento non transcenderon máis datos sobre o seu estado de saúde.
